अम्मा सिरका लिहिउ सजाय

संपादक-शारदा शुक्ला

*गन्ना कै रस आवत होई*
*डेउढी का महकावत होई*
*लिहा गिलासी छोटका बबुआ*
*गझिनै दहिउ मिलावत होई*
*सुधि चैती बइसाख कै आवै*
*दांत लड़कपन कै सहलाय*
*अम्मा सिरका लिहिउ सजाय* !

*बगियम् लदा टिकोरा होई*
*खुला अनाजेक् बोरा होई*
*खडी दुपहरिम् बरफ खवाइस*
*उलझा परा कटोरा होई*
*दानेदार खांड कै कूंणा*
*सपनन मा हम लिहन गिराय*
*अम्मा सिरका लिहिउ सजाय* !

*लागि अरहरिक् भीरी होई*
*पातिक् बनत पिपीहिरी होई*
*मेरि मेरि चिरइन के साथे*
*टीं टीं करत टिटीहिरी होई*
*अमझोर्रा रोटिक् चटकारा*
*बीता बचपन दिययि घुमाय*
*अम्मा सिरका लिहिउ सजाय* !

*रोजगारी अस गांव छोडाइस*
*जूड नीब कै छांह छोडाइस*
*ऊपर से इ दुनियादारी*
*भाइस् भाइक बांह छोडाइस*
*बस यादनि कै सुख मा अवधी*
*जिनगी कै दिन बीतत जाय*
*अम्मा सिरका लिहिउ सजाय*!!

( *संजय श्रीवास्तव अवधी* )
*मनकापुर गोंडा उत्तर प्रदेश*